म. टा. विशेष प्रतिनिधी, मुंबई
भाजप-शिवसेना असा वाद राज्यात रंगत असला तरी जनतेचे सरकार म्हणून काम करताना सर्व मंत्र्यांमध्ये एकी असावी या उद्देशाने मुख्यमंत्री देवेंद्र फडणवीस यांनी पुढाकार घेऊन सर्व मंत्र्यांना एकाच पंगतीत बसून उदरभरण करण्याचे फर्मान सोडले आहे आणि त्यानुसार मंगळवारी कॅबिनेट बैठकीनंतर ओल्या काजूची उसळ, घेवड्याच्या शेंगा, भेंडीची भाजी, भरली कारली, साजुक तुपातील वरण-भात आणि गाजराचा हलवा असे सुग्रास भोजनाने भरलेले डबे मंत्रालयात आले आणि मंत्र्यांनीही त्यावर आडवा हात मारला.
राज्यात युतीचे सरकार आले असले तरी दोन्ही पक्षांत सतत धुसफूस सुरू आहे. राज्याचे प्रमुख या नात्याने मुख्यमंत्री देवेंद्र फडणवीस यांनी ही परिस्थिती बदलण्याचे ठरवले आहे. मंत्र्यांमध्ये संवाद वाढावा, त्यांच्यातील दुरावा कमी व्हावा, सरकार म्हणून काम करताना मंत्रिमंडळाकडून चांगली कामगिरी होईल या हेतूने फडणवीस यांनी दर मंगळवारी मंत्रिमंडळाची बैठक संपल्यानंतर सर्व मंत्री एकत्र जेवतील अशी व्यवस्था केली आहे. प्रत्येक मंत्र्यांने आपापल्या घरून जेवणाचा डबा आणायचा आणि सर्वांनी एकत्र बसून भोजनाचा आस्वाद घ्यायचा, असे मुख्यमंत्र्यांनी सर्वांना आग्रहाने सांगितले. मंगळवारी बहुतांश लोक शाकाहारी जेवण घेत असल्याने शक्यतो शाकाहारीच बेत असावा, अशी पुस्तीही या आग्रहाला होती.
त्यानुसार मंगळवारी मंत्र्यांनी आपापल्या घरून डबे आणले. काही मंत्र्यांच्या बंगल्यावरून डबे आलेच, पण जे मुंबईत राहतात त्या मंत्र्यांचे तर 'सरकारी' आणि 'घरगुती' असे दोन्ही डबे मंत्रालयात पोहोचले.
आपला डबा मंत्रिमंडळासमोर उघडला जाणार असल्याने प्रत्येकाने खास फमाईश करून डबा बनवल्याचे कळते. सार्वजनिक बांधकाम मंत्री चंद्रकांत पाटील यांच्या डब्यात घेवड्याच्या शेंगेची भाजी होती, तर अन्न व नागरी पुरवठा मंत्री गिरीश बापट यांच्या डब्यात वांगे-बटाट्याची भाजी, तुरडाळीचे वरण आणि गाजराचा हलवा होता. सार्वजनिक उपक्रम मंत्री एकनाथ शिंदे यांच्या डब्यात, ओल्या काजूची भाजी, भेंडीची भाजी, मसाला कारले असा बेत होता, तर शिक्षण मंत्री विनोद तावडे यांच्या डब्यात साजूक तुपातील वरण आणि भात असा बेत होता. परिवहन मंत्री दिवाकर रावते दुपारचे जेवण टाळत असल्याने त्यांनी डब्याला बुट्टी मारल्याचे कळते, तर आरोग्य मंत्री डॉ. दिपक सावंत यांनी उपवास असल्याचे सांगत जेवणाचे टाळले. विदर्भातील ठेचा आणि मराठवाड्यातील शेंगदाण्याची चटणी आग्रहाने प्रत्येकाकडे यावेळी फिरविण्यात आली. हे पहिलेच स्नेह भोजन असल्याने केवळ भोजन झाले, हळूहळू स्नेह वाढत जाईल अशी प्रतिक्रिया एका ज्येष्ठ मंत्र्याने दिली.
खास पदार्थांनी पंगतीला रंगत
मुख्यमंत्र्यांनी दिलेल्या सूचनेनुसार मंगळवारी, कॅबिनेट बैठकीदिवशी मंत्र्यांनी आपापल्या घरून डबे आणले होते. काही मंत्र्यांच्या बंगल्यावरून डबे आलेच, पण जे मुंबईत राहतात त्या मंत्र्यांचे तर 'सरकारी' आणि 'घरगुती' असे दोन्ही डबे मंत्रालयात पोहोचले.
आपला डबा मंत्रिमंडळासमोर उघडला जाणार असल्याने प्रत्येकाने खास फमाईश करून डबा बनवल्याचे कळते. सार्वजनिक बांधकाम मंत्री चंद्रकांत पाटील यांच्या डब्यात घेवड्याच्या शेंगेची भाजी होती, तर अन्न व नागरी पुरवठा मंत्री गिरीश बापट यांच्या डब्यात वांगे-बटाट्याची भाजी, तुरडाळीचे वरण आणि गाजराचा हलवा होता. सार्वजनिक उपक्रम मंत्री एकनाथ शिंदे यांच्या डब्यात, ओल्या काजूची भाजी, भेंडीची भाजी, मसाला कारले असा बेत होता, तर शिक्षण मंत्री विनोद तावडे यांच्या डब्यात साजूक तुपातील वरण आणि भात असा बेत होता. परिवहन मंत्री दिवाकर रावते दुपारचे जेवण टाळत असल्याने त्यांनी डब्याला बुट्टी मारल्याचे कळते, तर आरोग्य मंत्री डॉ. दीपक सावंत यांनी उपवास असल्याचे सांगत जेवणाचे टाळले. विदर्भातील ठेचा आणि मराठवाड्यातील शेंगदाण्याची चटणी आग्रहाने प्रत्येकाकडे यावेळी फिरविण्यात आली. हे पहिलेच स्नेहभोजन असल्याने केवळ भोजन झाले, हळूहळू स्नेह वाढेल, अशी प्रतिक्रिया एका ज्येष्ठ मंत्र्याने दिली.
मोबाईल अॅप डाउनलोड करा आणि राहा अपडेट