मनी लाँडरिंग प्रकरणात अटक झालेले राष्ट्रवादी काँग्रेसचे माजी खासदार समीर भुजबळ यांची सक्तवसुली संचलनालयाच्या (ईडी) अधिकाऱ्यांनी चौकशी सुरू केली आहे. मात्र, ईडीच्या प्रश्नांना उत्तरे देण्यास टाळाटाळ करणाऱ्या समीर यांनी गैरव्यवहाराशी आपल्या 'पीए'चा संबंध असल्याचा दावा केल्याचे कळते.
राष्ट्रवादीचे बडे नेते छगन भुजबळ यांचे पुतणे असलेल्या समीर भुजबळना सेशन्स कोर्टाने ८ फेब्रुवारीपर्यंत कोठडी दिल्याने त्यांचा ताबा सध्या 'ईडी'कडे आहे. भुजबळ यांच्या मालकीच्या ट्रस्टमधून मोठ्या प्रमाणावर पैसा वळविताना हवाला पद्धतीचा वापर झाल्याचा संशय आहे. चौकशीसाठी तीनवेळा समन्स बजावूनही समीर भुजबळ हजर न झाल्याने अखेर त्यांना अटक करण्यात आल्याची माहिती 'ईडी'तर्फे मंगळवारी कोर्टाला देण्यात आली.
दिल्लीतील महाराष्ट्र सदन, मुंबईत कालिना येथील भूखंड हडप करणे आणि मनी लाँडरिंगबद्दल छगन भुजबळ यांच्यासह त्याचे पुत्र पंकज आणि पुतणे समीर यांच्याविरोधात 'ईडी'ने गुन्हे दाखल केले आहेत. सुमारे १२५ कोटी रुपयांचे संशयित व्यवहार तपासण्यासाठी समीर यांची चौकशी करायची असल्याचे 'ईडी'ने कोर्टाला सांगितले आहे.
मोबाईल अॅप डाउनलोड करा आणि राहा अपडेट