पुणेः आजच्या अॅमेझॉन, फ्लिपकार्टच्या 'ऑनलाइन' जमान्यात आपल्याला एखादी वस्तू देशाच्या दूरच्या टोकावरून आणि तीही सवलतीत मागवणे सोपे झाले आहे; पण एखादी वस्तू आपल्या आजूबाजूच्या किंवा शहरातील कोणत्या दुकानात (ऑफलाइन मार्केटमध्ये) मिळेल, त्यावर कोणत्या दुकानात काही सवलती आहेत का, याची आपल्याला फारशी माहिती नसते. किंबहुना त्यावाचून अनेकदा अडतेही. नेमकी हीच अडचण ओळखून पुण्यातील एका कंपनीने एक अनोखे मोबाइल अॅप्लिकेशन तयार केले आहे. 'जिली' असे त्या अॅपचे नाव असून, पुण्यातील 'लिव्हरएज सोल्युशन्स' या कंपनीने ते विकसित केले आहे.
पुण्यातील चार सॉफ्टवेअर इंजिनीअर्सनी एकत्र येऊन ही कंपनी स्थापन केली आहे. एखाद्या विशिष्ट ब्रँडची वस्तू किंवा कपडे विश्वासार्ह ठिकाणाहून घ्यायचे असतील, तर ते शोधून देणारी कोणतीही यंत्रणा ऑनलाइन व्यासपीठावर उपलब्ध नाही, हे लक्षात घेऊन कंपनीतर्फे हे अॅप तयार करण्यात आले आहे. त्यासाठी पुणे शहरातील वेगवेगळ्या रिटेलर्सशी बोलून, त्यांची माहिती गोळा करून अभ्यास करण्यात आला. सध्या या अॅप्लिकेशनवर २२५ रिटेलर्सची माहिती उपलब्ध करण्यात आली असून, आणखी रिटेलर्सपर्यंत पोहोचण्याचे काम सुरू आहे. सुरुवातीच्या कालावधीत रिटेलर्सना या अॅप्लिकेशनवर आपली माहिती मोफत देता येणार असून, नंतर त्यासाठी योग्य ते शुल्क आकारले जाणार आहे, अशी माहिती कंपनीतर्फे हर्षला वाडकर यांनी दिली.
सध्या हे अॅप्लिकेशन अँड्रॉइड यूझर्ससाठी विकसित करण्यात आले असून, गुगल प्ले स्टोअरवर ते Jili या नावाने मोफत उपलब्ध आहे. लवकरच अॅपल ऑपरेटिंग सिस्टीमसाठीही ते उपलब्ध होणार आहे.
ग्राहकांसाठी
मोबाइलमध्ये लोकेशन डिटेल्स 'ऑन' केल्यावर परिसरातील दुकानांची माहिती मिळेल. अॅप डाउनलोड करून, रजिस्ट्रेशन करून एकदा वापरल्यानंतर ऑफलाइन वापर शक्य. लाइफस्टाइल (कपडे), होम डेकॉर, फर्निचर, इलेक्ट्रॉनिक्स या प्रकारांतील वस्तूंच्या दुकानांची माहिती उपलब्ध. संबंधित दुकानात उपलब्ध वस्तूंचे ब्रँड्स, ऑफर्स, डील्स, डिस्काउंट्स, दुकानाची वेळ, वस्तू बदलून घ्यायची वेळ, पेमेंट मोड (कॅश/कार्ड), संपर्क, पत्ता, स्थळाचा नकाशा आणि आपल्या ठिकाणापासून दुकानाचे अंतर एवढी माहिती प्रत्येक दुकानाबद्दल उपलब्ध. विशिष्ट ब्रँड, विशिष्ट भाग (उदा. सिंहगड रोड), डिस्काउंट अशा वेगवेगळ्या फिल्टर्सद्वारे दुकाने शोधणे शक्य
रिटेलर्ससाठी
जास्त आणि निश्चितपणे खरेदी करणाऱ्या ग्राहकांपर्यंत पोहोचायला मदत. जाहिरातीचा खर्च कमी होणार. ग्राहकांचा डेटाबेस तयार होण्यास हातभार. छोट्या दुकानदारांसाठी अधिक फायदेशीर. सवलती, विशेष योजना अॅलर्टद्वारे ग्राहकांपर्यंत पोहोचवता येणार.
मोबाईल अॅप डाउनलोड करा आणि राहा अपडेट