म. टा. प्रतिनिधी, मुंबई
भाजपाचे खासदार किरीट सोमय्या यांचा मुलगा नील यांच्या हाताला घरात काच लागून जखमी होण्याची घटना सोमवारी रात्री घडली होती. मात्र, नील यांनी आत्महत्येचा प्रयत्न केल्याच्या अफवांना मंगळवार रात्रीपासून ऊत आला होता. पोलिसांनी या अफवांचे खंडन केले असून, 'नील घरीच जखमी झाले होते, त्यांना हॉस्पिटलमध्ये दाखल केल्यानंतर तशी नोंदही पोलिस स्टेशनमध्ये झाली आहे', असे पोलिसांनी स्पष्ट केले आहे.
मुलुंड (पू.) निर्मलनगर परिसरात भाजपाचे खासदार किरीट सोमय्या कुटुंबीयांसह राहतात. त्यांचा मुलगा नील यांचा वसई येथे रिअल इस्टेटचा व्यवसाय आहे. नील सोमवारी मध्यरात्री मद्यपान करून घरी परतले होते. रात्री बारा वाजण्याच्या सुमारास किचनमध्ये पाणी पिण्यासाठी जात असताना काचेच्या टीपॉयवर पडल्याने नील यांच्या हाताला जखम झाली. आवाजामुळे सोमय्या कुटुंबीय जागे झाले. नील बेशुद्ध अवस्थेत आढळताच त्यांना उपचारासाठी मुलुंडमधील खासगी हॉस्पिटलमध्ये हलविण्यात आले. या घटनेची माहिती नवघर पोलिसांना मिळाल्यानंतर त्यांनी घटनेची नोंद करत, नील यांचा डिस्चार्ज झाल्यानंतर जबाब नोंदवला. त्यात, मद्याच्या अमलाखाली असताना अपघाताने हाताला जखम झाल्याचे त्यांनी म्हटले आहे. मात्र, नील यांनी हाताची नस कापून आत्महत्येचा प्रयत्न केल्याची अफवा मंगळवारी रात्रीपासून सोशल नेटवर्किंग वेबसाइटवर फॉरवर्ड होऊ लागली. किरीट सोमय्या यांनी स्वतःहून या अफवांचे खंडन केले.
मोबाईल अॅप डाउनलोड करा आणि राहा अपडेट