anurag.kamble@timesgroup.com
मुंबई पोलिस दलात महिलांचा टक्का वाढण्यासाठी २०१६ मध्ये होऊ घातलेल्या पोलिस शिपायांच्या भरतीत ३० टक्के पदे महिला उमेदवारांसाठी राखीव ठेवण्यात आली आहेत. राज्य पोलिस दलातील ४०१४ रिक्त पदे भरण्यासाठी भरती प्रक्रिया सुरू होत असून ऑनलाइन पद्धतीने होणाऱ्या या भरतीसाठी अर्ज करण्यास बुधवारपासून सुरूवात झाली. विशेष, म्हणजे पुरुषांची मक्तेदारी असलेल्या पोलिस बँडमध्ये महिलांनाही संधी देण्याचा निर्णय घेण्यात आला आहे. तसेच, या भरती प्रक्र‌ियेत यश न मिळाल्यास कारागृह विभाग आणि राज्य सुरक्षा महामंडळातही काम करण्याची संधी निवड झालेल्या उमेदवारांसाठी असणार आहे.
महाराष्ट्र पोलिस दलात दोन लाख १० हजारांच्या आसपास पोलिस अधिकारी-कर्मचारी आहेत. परंतु, यात महिलांची एकूण टक्केवारी अवघी १०.४८ टक्के इतकीच आहे. पोलिस दलात महिलांचे प्रतिनिधित्व वाढण्यासाठी होऊ घातलेल्या पोलिस भरतीत महिलांना प्राधान्य देण्याचे ठरव‌िण्यात आले आहे. पोलिस शिपायांच्या ४०१४ रिक्त पदांसाठी जाहीर करण्यात आलेल्या भरती प्रक्रियेतील ३० टक्के पदे राखीव ठेवण्यात येणार आहेत. तसेच, पोलिस बँड पथकामध्येही महिला उमेदवारांनी अर्ज करावेत, असे आवाहन पोलिसांकडून करण्यात आले आहे. इतर राज्यांच्या मानाने महाराष्ट्र पोलिस दलात महिला अधिकारी-कर्मचाऱ्यांची संख्या समाधानकारक आहे, परंतु, ती अधिक वाढावी असा आमचा प्रयत्न आहे, असे राज्याचे पोलिस महासंचालक प्रवीण दीक्षित यांनी स्पष्ट केले. आतापर्यंत पुरुषांचे क्षेत्र असलेल्या पोलिस बँडमध्येही महिलांनी यायला हरकत नसून त्यासाठी भरतीमध्येच महिलांनी बँडसाठी अर्ज करावेत, असे अधोरेख‌ित केल्याचे महासंचालक म्हणाले.
याशिवाय २०१५-२०१६ च्या भरतीमध्ये आणखी काही नवे बदल करण्यात आले आहेत. पोलिसांचे पाल्य (तीन टक्के), कर्तव्य निभावत असताना मरण पावलेल्या पोलिसांच्या मुलांसाठीही (दोन टक्के) जागा राखीव ठेवण्यात आल्या आहेत.
धावण्याच्या चाचणीचे अंतर कमी
सन २०१४ मध्ये पोलिस भरतीदरम्यान तरुणांचा मृत्यू झाला होता. याची दखल घेत राज्य सरकारने धावण्याच्या चाचणीचे अंतर कमी करण्याच्या सूचना केल्या होत्या. त्यानुसार, यावर्षीपासून पुरुष उमेदवारांसाठी पाच किमीऐवजी १६०० मीटर तर महिला उमेदवारांसाठी तीन किमी ऐवजी ८०० मीटर धावण्याची चाचणी घेण्यात येईल.
कारागृह विभाग, सुरक्षा महामंडळामध्ये संधी
कारागह विभागातील कारागृह शिपायांची पदे भरण्याची प्रक्रिया पोलिस विभागाकडून राबव‌िण्यात येणार आहे. कारागृह विभागातील शिपाई पदासाठी उमेदवार उपलब्ध झाले नाही, तर शिपाई पदासाठी असलेल्या प्रतीक्षा यादीतील इच्छुक उमेदवारांना कारागृहातील पदांसाठीच्या निवडसूचीमध्ये समाव‌िष्ट होण्याची संधी मिळणार आहे.
तसेच शिपाई पदासाठी पात्र ठरलेल्या परंतु, अंतिम निवड यादी निवड न झालेल्या इच्छुक उमेदवारांना, महाराष्ट्र राज्य सुरक्षा महामंडळामध्ये मुलाखत घेऊन अकरा महिन्यांच्या करार पद्धतीवर काम करण्याची संधी मिळणार आहे.
० एकूण पदे - ४०१४
० अर्ज करण्याची मुदत - ३ फेब्रुवारी ते १८ फेब्रुवारी
० अर्ज करण्याची पध्दत - ऑनलाइन
मोबाईल अॅप डाउनलोड करा आणि राहा अपडेट