जानेवारी महिना संपता संपताच शहापूर तालुक्यात पाणीबाणी सुरू झाली असून तालुक्यातील अजनुप ग्रामपंचायतीच्या हद्दीतील उठावा या ठिकाणी विहिरीचा अर्धा भाग अचानक कोसळल्याने तिथे पाणी भरत असलेली १४ वर्षांची मुलगी विहिरीत पडून जखमी झाली. गावकऱ्यांच्या सर्तकतेमुळे या मुलीचे प्राण वाचले.
अजनुप ग्रामपंचायतीच्या उठावा येथील विहिरीवर वसंती चंदर दुबेले ही मुलगी पाणी भरण्यासाठी आली असता, अचानक विहिरीचा अर्धा भाग कोसळून वसंती विहिरीत पडली. गावकऱ्यांनी तात्काळ हालचाल करून तिला बाहेर काढल्याने तिचा जीव वाचला. याआधी या विहीरीत दोन बैलही पडले होते, ते गावकऱ्यांनी काढले होते. या प्रकारामुळे अजनुप परिसरातील १२ आदिवासी पाड्यांना तीव्र पाणीटंचाईशी सामना करावा लागणार आहे. आमदार पांडुरंग बरोरा यांनी घटनास्थळी भेट देऊन तातडीने विहिरीची दुरुस्ती करण्याचे व पाच हजार लिटरची सिन्टेक्सची टाकी बसवून, टँकरने पाणीपुरवठा करण्याच्या सूचना शहापूर पंचायत समितीला दिल्या आहेत. डिसेंबर महिन्यातच टँकर सुरू करण्याबाबत प्रस्ताव देऊनही शहापूर पंचायत समितीने त्याकडे दुर्लक्ष केल्याची तक्रार गावकऱ्यांची आहे.
मोबाईल अॅप डाउनलोड करा आणि राहा अपडेट